Sche peynyth here to make good cuntenaunce
And forth I lete here sayle in this manere
And turne I wele a-geyn to myn matere
Line 322
The modyr of the soudon welle of vices
Espyed hath here sonys pleyn entente
How he wolde lete his olde sacrifises
And ryȝt a-non sche for here conseyl sente
Line 326
And they be come to knowe what sche mente
And whan assembelede were þe folk en feere
Sche sette here doun & seyde as ȝe schal here
Line 329
Lordys quod sche ȝe heryn euerychon
How þat myn sone in poynt is for to lete
The holy lawis of oure alkaron
Ȝeuen be goddys message Makomete
Line 333
But on a wow to grete god I heete
The lyf schal raþere out of myn body sterte
On makometes lawe out of myn herte
Line 336
What schulde vs tydyn of this newe lawe
But thraldam to oure bodyis & penaunce
And aftyr in helle for to be drawe
ffor we reneyede mahoun oure creaunce
Line 340
But lordis wele ȝe makyn a suraunce
As I schal seyn assentynge to myn lore
And I schal make vs saf for euere more
Line 343
They sworyn & assentyn euery man [folio 199a]
To lyue with hyre & deye & by here stonde
And eueryche in þe beste wyse sche can
To strenthe here schal alle here frendis fonde
Line 347
And sche hath this empryse take on honde
Whiche ȝe schal here that I schal deuyse
An[d] to hem alle sche spak ryth in þis wyse
Line 350
