I trowe at troye whan pirrus brak þe wal
Or ylion brende at thebes the cetee
Nat rome for þe harm þorw hanybal
That romaynys han enqueschid tymys three
Line 291
Nas herd swich tendere wepyng for pete
As in the chaumbere was for here departynge
But forth sche muste / where so sche wepe or synge
Line 294
O fyrste moeuyng crewel fyrmament
With thi dyurnal which þat croudist ay
And hurlyst al from est til occident
That naturally wolde holde a-noþer way
Line 298
Thi croudyng set þe heuene in swich aray
At þe begynynge of this ferse viage
That crewel mars hath slaye þis maryage
Line 301
Infortunat ascendent tortuous
Of which þe lord is helpeles falle allas
Out of hese angels in-to þe derkeste hous
O mars o ataȝer as in this cas
Line 305
O febele mone vn-happi ben thi pas
Thow knyttist þe þere þat art not reseyuyd
There þow were wel from thens art thow weyuyd
Line 308
Inprudent Emperour of Rome allas [folio 198b]
Whas þere no philisophere in al thyn toun
Is no tyme bet þan oþer in swich cas
Of viage is þere non eleccioun
Line 312
And namely to folk of high condicioun
Nat whan a rote is of a burthe I-knowe
Allas we ben to lewede & to slowe
Line 315
To schip is brouȝt this woful fayre mayde
Solempnely with euery circumstaunce
Now Ihesu crist be with ȝow alle sche seide [[altered from sende]]
There is namore but fare wel fayre Custaunce
Line 319
