That euery knyȝt with gret deuocioun
Schulde preye crist þat he this maryage
Receyue In gre & spede þis viage
Line 259
The day is come of here departynge
I sey the woful fatal day is come
That þere may be no lengere taryinge
But forward þey hem drese alle & some
Line 263
Custaunce that was with sorwe al ouyrcome
fful pale a-ryst & dreseth here to wende
ffor weel sche seeth there is non oþer ende
Line 266
Allas no wondir is it þow sche wepte
That schal be sent in-to straunge nacioun [[altered]]
ffor frendys that so tenderely here kepte
And to ben boundyn vndyr subieccyoun
Line 270
Of on sche knowyth not hese condicioun
Housbondis ben alle goode & han been ȝore
That knowyn wyuys I dar sey ȝow no moore
Line 273
ffadyr sche seyde þyn wrechede chyld Custaunce [folio 198a]
Thi ȝonge douȝty fosterede vp so softe
And ȝe myn modyr myn souereyn plesaunce
Ouer alle thynge out take cryst on lofte
Line 277
Custaunce ȝore child hire recomaundyth ofte
Vn-to ȝoure grace for I schal to surrye
Ne schal I neuere sen ȝow more with eye
Line 280
Allas vn-to þe barbre nacioun
I muste anon sithe þat it is ȝoure wille
But cryst þat starf for our redempcyoun
So ȝeue me grace hese hestis to fulfylle
Line 284
I wreche woman no fors thow I spille
Wemen are bore to thraldam & penaunce
And to ben vndyr manys gouernaunce
Line 287
