ffor in þe sterris clerere than is glas
Is wrete god wot ho so coude it rede
The deth of euery man / with outyn any drede
Line 196
In sterrys manye a wyntyr there be-forn
Was wretyn þe deth of ector achilles
Of pompeye Ielyus er þey were born
The stryf of thebes & of hercules
Line 200
Of sampson Thurnus & of socrates
The deth but menys wittys ben so dulle
That no with can wel rede it at þe fulle
Line 203
This soudon for hese priuy conseyl sente [folio 197a]
And schortely of þis matiere for to pace
He hath to hem declarede his entente
And seyde serteyn but he myȝte han grace
Line 207
To han custaunce with-inne a lytyl space
He nas but ded & chargede hem in hye
To schapyn for hese lyf sum remedye
Line 210
Dyuerse men dyuerse thyngys seydyn
They argumentyn & castyn vp & doun
Manye a subtyle resoun forth þey leydyn
They spekyn of Magyk & Abusioūn
Line 214
But fynally as in conclusioun
They can not sen in that non auantage
Ne in non othir woye saue maryage
Line 217
Thanne sawe they þerin swich difficulte
Be weye of resoun for to speke al pleeyn
Be cause þere was / swich dyuercyte
Be-twethyn here bothe lawys þat þey seyn
Line 221
They trowede that no crystene prynce wolde fayn
Weddyn his chyld vndyr oure lawys swete
That vs was tauȝt be mahoun oure prophete
Line 224
