In here is high beute with-oute pryde
Ȝouthe with-oute grenehede or folye [[in a later hand]]
To alle here werkys vertu is here gyde
Humblesse hath slayn in here al tyrannye
Line 165
Sche is myrour of alle curteysye
Here herte is verray chambyr [[or chambur]] of holynesse
Hire hand mynystre of fredom for almesse
Line 168
And al þis voys was soth as god is trewe [folio 196b]
But now to purpos lat vs turne ageyn
These marchantys han don frauȝt here schepis newe
And whan þey han þis blysful maydyn seyn
Line 172
Hom to surry ben þey went ful feyn
And on here nedys as þey [[han put-in in a later hand]] don ful ȝore /
And lyuen in wele I can sey ȝow no more
Line 175
Now fil it þat these marchantys stode in grace
Of hym þat was þe soudon of surrye
ffor whan þey come from ony strange place
He wolde of hese benygne curteysye
Line 179
Make hem good cher & besyly espye
Tydyngis of sundery regnys for to lere
The wonderis þat he myghte sen or here
Line 182
Amongis oþere thyngis specially
These marchauntis han hym told of dame Custaunce
So gret noblesse in ernest certeynly
That this soudan hath cauȝt so gret plesaunce
Line 186
To han hyre fygure in hese remembraunce
And al hese lust & al hese besy cure
Was for to loue here whil his lyf may dure
Line 189
Perauenture in thilke large boke
Which þat clepid is þe heuene I-wretyn was
With sterrys whan þat he hese berthe tok
That he for loue schulde han hese deth allas
Line 193
