Thei tolde euery man that he was wood
He was a-gast so of the Nowels flood
Thurgh fantasie that of his vanyte
He hadde bought hym kneding tubbes three
Line 3836
And hadde hem hanged in the roof aboue
And that he praiede hem for goddis loue
To sitten in the roof par companye
The folk gan laughwen at his fantasie
Line 3840
And to the roof thei kiken and thei gape
And turned al his harm vnto a Iape
ffor what this carpentere answerde
It was for nought no man his resoun herde
Line 3844
With othes gret he was sworne adoun
That he was holden wood in al that toun
ffor euery clerk anoon right helde with other
Thei seide the man is wood my leue brother
Line 3848
And euery wight gan laughwen at his stryf
Thus swyued was the carpenters wyf
ffor al his kepyng and his Ialousie [Sloane MS. 1685 folio 43b]
And Absolon hath kist hir nethir ye
Line 3852
And Nicholas is scaldid in his toute
This tale is don and god saue al the route
Explicit fabula molendinarij. [[No break in the MS.]] [[Of leaf 85, the Cambridge MS has only cas l. 3855, pleye, l. 3858, and greue l. 3859.]]
