[6-text p 683] thynke that they ne myght not longe preserve in good|nes / [1071] The fyrst wanhope commeth of that he demyth that he hath synned so gretely / and so ofte / and so longe lyen in synne þat he shall not be savid / [1072] Certes ageyns this cursid wanhope sholde he thynke that the passioun of our lorde Ihesu Crist is more stronge for to vnbynde than synne is stronge / [no gap in MS.] [1073] Ageyns þe secounde wanhope he shall thynke that as ofte as he fallith he may arrise ageyne by penitence / and thouh he nevir so longe haue leyne in synne / the mercie of god is allwey redye to receyve hym to mercie / [1074] Ageyns that wanhope that he demeth that he sholde not longe persevere in goodnes / he shall thynke the febylnes of the devill may no thynge done but men woll suffyr hym [1075] & eke he shall haue strength of the help of god and of alle holy chirche and of the proteccioun of alle aungells yff hym lyst //
[1076] Then shull men vndirstonde what is the rewarde of penaunce and aftir the worde off Ihesu Criste hit is the endeles blysse of hevyne [1077] ther ioye hath no contrarie of no wo ne grevance / there alle harmes bene passid of this present lyff / there as is sykernes frome the peyne off helle / there as the blissidfull companye that [Addit. MS. 5140 folio 357a] reioysen evirmore eueryche of others ioye / [1078] there as the bodye of a man that whilom was foule and dyrke is more clerer than the sonne / there as the bodye was whilom seke frel febyll and mortall / is inmortall and so stronge and so hole that there may no thyng apayre hit / [1079] ther as is neithyr hungyr nor thurst ne colde / but euery soule replenysshid with the sight of the parfite knowynge of god / [1080] This blessid regne mowe men purchace by poverte espirituall and the glorie bi lowly|nes / The plente of ioye by hungyr and thurst/ and the reste by travell / and the lyff by dethe and mortificacioun off synne Amen./
