[6-text p 682] wenith that he may suffre no penaunce / [1059] There ageyns is remedie / for to thynke þat bodye penaunce is but shorte and litel at regarde of þe peyne of helle / that is cruell and so longe that it lastith withoute eende /
[1060] Nowe ageyns the shame that a man hath to shryve hym and namely thes ypocrytes that wolde beholde so parfite that they haue no nede to shryve hem / [1061] ageyns that shame sholde a man thynke that by waye of reasoun that he that hath nat bene shamed to do foule thynges Certes hym ouht nat to be ashamed to do fayre thynges / and that is confessions // [1062] A man sholde eeke thynk that god seeth and wot alle thy thouhtes and alle thy workes / Fro hym may no thynge be hide ne coverid / [1063] Men sholde eke remembre hem of the shame that is to come atte the daye of dome to hem that be nat penitent and shryven in this present lyff / [1064] For all the creaturs in erthe and in helle shull seene appertely alle that he hydeth in this worlde /
[1065] Now for to speke of the hope of hem þat bene negligent and slowe to shryve hem / hit stont in .ij. maners / [1066] the tone is þat he hopith for to lyve longe / and for to porchace [Addit. MS. 5140 folio 356b] moche riches for his delyte / and then he wolde shryve hym & as he seith he may as hym semyth than tyme Inouh for to come to shrifte / [1067] Another is surquedre that he hath in cristis mercye [1068] Ageyne the fyrst vice / he shall thynke that our lyff is in no sekyrnes / and eke that alle the riches in this worlde ben in aventure and passen as a shaddowe in the walle [1069] as seith Seynte Gregorie that hit perteynith to the grete rihtwousnes of god / that nevir shall the peyne stynte of hem that nevir wolde withdrawe hem from synne and rancour but aye contynue in synne / For thilke perpetual wille to done synne they shull haue perpetuall peyne //
[1070] Wanhope is in .ij. maners / the fyrst wan|hope is in the mercie of Crist / that othir is that they
