[6-text p 658] euene cristene / and eke chastise ther as nede is // [811] A nother maner of remedie agayns Auarice is resonable largesse / But soothly here byhoueth the con|syderacion of the grace of ihesu criste. and of his temporel goodes eke & of the goodes perdurables that criste yaf vs / [812] & eke to han remembraunce of the deeth that he shal receyue. he noot whanne. & eke that he shal forgoon al that he hath. saue oonly that he hath despended in good werkys //
[813] But for as myche as som folke ben vn Mesur|able. men oughte eschewe fool largesse that men clepen waaste // [814] Certes he that is fool large. ne yeueth nat his catel but he leseth his catel / Soothly what thynge that he yeueth for veyn glorie / as to Mynstrals / & to folke for to beren his renoun in the worlde / he hath synne & noon almesse / [815] certes he leseth firste hys godes. that ne seketh with the yefte of his good / nothynge but synne / [816] he is lyke to an hors that seketh rather to drynke drouy or trowble water than for to drynkee water of the clere welle / [817] And for as myche as they yeuen. there as they shulde nat yeuen. to hem aperteyneth thilke malison that criste shall yeue at the day of dome to hem that shullen be dampned
.De .Gula./
[818] After Auarice comyth Glotonye. whiche is expresse [Gula] eke a-geyn the commaundement of god // Glotonye is vnmesurable appetyte to ete or to drynke. or ellys to doon y-now to the vnmesurable appetyt & desordeyne couetise to ete or to drynke / [819] This synne [Christ Church MS folio 270a] This synne corrumped al this world / as is wele shewed in the synne of Adam & of Eue. loo eke what seith seint Poule of glotonye / [820] Many seith seint Poule goon / of whiche
