[6-text p 651] berynge & in chere / & in dede / [738] Eke ther ben more special remedies agayns Accidie in dyuers werkys. And in consideracions of the peynes of helle [Christ Church MS folio 267b] and of the ioyes of heuene / And in the truste of the grace of the holy goost that wole yeue hym myght to performe ys good entente.
De Auaricia
[739] Aftyr Accidie wole I speke of Auarice / & of coueitise / of whiche synne / seith seint Poule / that the rote of alle harmes ys couetise / Ad Thimoth.6to. [740] For soothly whan the herte of mar is confounded in it selfe & trowble / and that the soule hath loste the comfort of god than seketh he an ydel solace of wordly thynges
[741] // Auarice aftir the descripcioun / of seint Augustyn is lykerous in herte to haue erthely thynges / [742] som other folke seyn that auarice is for to purchace many erthely thynges. & no thynge yeue to hem that han nede // [743] And vndirstonde that Auarice ne stant nat in londe ne catel. but som|tyme in science & in glorie. & in euery maner outrageous thynge. is Auarice & couetise / [744] And the difference bitwix Auarice & couetise is this / Couetise is this / Couetise is for to coueit swiche thynges as thow haste nat / And Auarice is for to with-holde & to kepe swiche thynges as thow haste with oute rightful nede / [745] Soothly this Auarice is a synne that is full dampnable / For alle holy writte curseth it / And speketh agayns that vice. For it dooth wronge to Ihesu criste / [746] For it byreueth hym the loue that men to hym owen. & turneth yt bakwarde agayns alle reson. [747] and makith that the Auaricious man hath more hope in his catel. than in Ihesu criste. and doeth more obseruaunce & kepynge of his tresore than he doth to the seruyse of Ihesu criste / [748] And therfore seith
