[728] Agayns this horrible synne of Accidie & the braun|ches of the same that is a vertue that is called Fortitudo. or strenght that is an affeccion thurgh whiche aman despiseth a noyous thynge // [729] This vertue is so myghty and so vigorous / that it dar withstonde myghtely & wisely kepe hym from periles that ben wikked / and wrastle agayns the assawtes of the deuel / [730] for it enhaunceth & enforceth the soule right as Accidie a-batith it and maketh it feble / For this Fortitudo may long endure by longe suffraunce. the trauailles that ben couenable //
[731] This vertue hath many spices // The firste is cleped magnanymite / that is to seyn grete corage . . . . . [no gap in the MS.] agayns Accidie / leste that it ne swolwe the soule / by the synne of sorwe. or destroye it by wanhope / [732] This vertue maketh folke vndirtake harde thynges & greuouse thynges by hire owne wille. wisely and resonabely / [733] And for as mychel as the deuel fyȝtteth agayns a man more by queyntyse and by sleight than by streght; therfore men shalle withstande hym by witte & by reson & by dis|crecion [734] Thanne Arn there the vertues of Feith & hope in god; and in his seintȝ to acheue & complice the good werkys whiche he purposeth fermely to contynue // [735] Thanne cometh seuerte or sikernesse & that is whan a man ne douteth no trauaille in tyme comynge of the good werkes that a man hath bygonne // [736] Than cometh magnificence / that is to seyn whan a man dooth & perfourmeth grete werkes of goodnesse And that is the ende why that men sholde doo gode werkys / For in the Accomplysynge of grete gode werkys. lyth the grete gerdoun [737] Thanne is there Constaunce that is stablenesse of corage / And this sholde ben in herte by stedeuast feith / And in mouth / and in
