[6-text p 648] man that it ne may in his lyfe be destroied by penitence. thurgh vertue of the passioun & of the deeth of crist [705] Allas what nedeth man thanne to ben despeired. sith that his mercy so redy is & large / axe & haue // [706] Thanne cometh sompnolense. that is sluggy slombrynge whiche maketh a man be heuy & dulle in body & in soule // & this synne cometh of sleuth / [707] And certes the tyme that by wey of reson men sholde nat slepe that is by the morwe / but if there were cause / resonable [708] for soothly the morwe tyde is moste couenable / a man to sey his preiers and for to thynke on god / & to honour god / & to yeuen almesse to the poore / that firste cometh in the name of criste / [709] loo what seith Salomon / who so wole by the morwe a-wake & seke me / he shalle fynde [710] Thanne cometh neclygence or rechele[s]nesse. that rekketh of no thynge /. and how that ignoraunce be moder of alle harme / certes necligence is the Norice / [711] Necligence ne doth noo force whan he shall doon a thynge whether he do it wele or baddely //
[712] Of the remedye of these twoo synnes as seith the wyse man that he that dredeth god / he spareth nat to doon that hym oughte doon. [713] & he that loueth god; he wole doon diligence to plese god to his werkis and a-bawndone hym selfe with alle his myght wele for to doon / [714] Than cometh Idelnesse that is the yate of alle harmes / An ydel man is lyke a place that hath no wallys the deuels may entre on euery syde / or sheet at hym ad diskouerte by temptacion on euery syde / [715] This ydelnesse is the Thurrok/ of alle wikked and vileyns. and of alle Iangles trufles / and of alle ordure / [716] Certes the heuen is yeuen to hem that wole labouren & nat to ydel folke / Eeke Dauid seith that they ne be nat in the laboure of men ne they shulle nat be whipped with men that is to seyn in purgatorie /
