[6-text p 643] that trauaillen in the seruyse of criste; so conforten the vileyns wordes & knakkys of Iaperis hem that trauaillen in the seruice of the deuel / [653] These ben the synnes that comen of the tonge. that comen of Iro & of other synnes moo
Remedium contra iram.
[654] The Remedie agayns Ire is a vertue that men clepen Mansuetude / that is debonairete And eke another vertue that men calleth pacience / or suffrance /
[655] debonairete withdrawith & refreyneth the sterynges & the meouynges of mannes corage in his herte in swiche manere/ that they ne skippe nat oute by angre ne by Ire. [656] Suffraunce suffrith swetely alle the Anoyaunces & the wronges that men doon to man outwarde [657] Seint Ierome seith thus of debonairete that it dooth noon harme to no wight ne seith ne for non harme that men doon ne seyn. he ne eschawfeth nat agayns his reson // [658] This vertue somtyme cometh of nature. /For as seith the Philosophre / A man is a quykke thynge by nature debonaire & tretable to goodnesse // But whan debonairete is enformed of grace than is it the more worth //
[659] Pacience that is a nother remedie agayns Ire is a vertue that suffereth swetely euery mannes godenesse / & nat wrooth for noon harme that is doon to hym // [660] The Philosophre seith that pacience is thilke vertue that suffreth debonairly alle the outrages of aduersite. & euery wikked worde // [661] This vertue maketh a man lyke to god & makyth hym his owne dere childe as seith criste / This vertue discomfiteth thyn enemy And therfore seith the wyseman / If thow wolte venquysshe thin enemy. lerne for to suffre / [662] And thow shalte vndirstonde that man suffreth .iiij. manere
