[6-text p 640]
[622] late vs thanne speke of chidynge & reproches whiche ben full grete woundes in mannes herte. For they vnsowen the semes of Frendeshippe in mannes herte. [623] For certes vnnethes may a man ben accorded with hym that hath hym opynly reuyled & repryued. & desclaundred This is a full grymly synne as criste seith in the gospel / [624] And take kepe now. that he that repreueth his neighebore / outher he repreueth hym by som harme of peyne that he hath on his body / as Mesel Croked harlote. or be som synne that he doth // [625] Now if he repreue hym by harme of peyne; than turneth the repref to Ihesu Criste for peyne is sente by the rightwis sonde of god / And by his suffraunce / be it Meselrie. or Mayme or Maladie // [626] And if he repreue hym vncharitably of synne / as thowe dronke|lewe harlot & so forth // thanne aperteyneth that to the reioysynge of the deuel / that euer hath ioy that men don synne / [627] And certes chidynge may nat come but out of a vyleyns herte. For after the habundaunce of the herte; speketh the mouth full ofte [628] And ye shulle vndirstonde / that loke by any way. whan any man shall chastice a nother. that he be ware. from chydynge or repreuynge For trewly but if he be ware; he may full lyghtly quyken the fuyr of angre & of wrath whiche that he sholde quenche & parauenture sleeth hym that he myght chastice with benyg|nyte[629] For as seith seint Salomon. The Amiable tunge is the tree of lyfe that is to seyn. of lyfe espirituel / and soothly a deslaue tunge sleeth the spirites of hym that repreueth / and eke of hym that is repreued / [630] lo what seyth seint Augustyn / ther is no thynge so lyke ye deuels childe. As he that ofte chideth Seint Poule seith eeke I seruaunt of god / byhoueth nat to chide. [631] And how that chidynge be a veleyns thynge bytwixe alle maner folke. yet is it certes [Christ Church MS folio 264b] moste vncouenable bitwixe a man & his wyfe. For ther is neuer reste
