[6-text p 616] so consentynge / departeth god fro man / and thanne wol I sle hym with myn hand in dede of synne ‖ thus seyth the feend / [357] for certes / thanne is a man al deed in soule / and thus is synne acompliced / by temp|tacion / by delit & by consentynge / & thanne is the synne clepid actuel
[358] ¶ ffor sothe / synne is in two maneres / outher it venyal / or dedly synne ‖ Soothly / whan man loueth any creature / moore than Ihu crist oure creatour / thanne is it dedly synne / and venial synne is it if man loue Ihu crist lasse than hym oghte / [359] for sothe / the dede of this venial synne is ful perilous / for it amenuseth the loue þat men sholde han to god moore & moore / [360] and therfore / if a man charge hym self with manye swiche venial synnes / certes / but if so be / þat he som tyme descharge hym of hem by shrifte / they mowe ful lightly amenuse in hym / al the loue / þat he hath to Ihu crist [361] and in this wise skippeth Venial / in to Dedly synne / for certes / the moore þat a man chargeth his soule / with venial synnes / the moore is he enclyned to falle in dedly synne / [362] And therfore / lat vs nat be necligent to deschargen vs of venial synnes / for the prouerbe seith / that manye smale maketh a greet ‖ [363] And herkne this ensample ‖ A greet wawe of the See / comth som tyme / with so greet a violence / that it drencheth the Shipe / and the same harm / doon som tyme / the smale dropes of water / þat entreth thurgh a litel creuesse in to the Thurrok/ & in the botme of the shipe / if men be so necligent þat men ne descharge hem nat by tyme / [364] and therfore / al thogh ther be a difference / bitwixe thise two causes of drenchynge / algates the Shipe is dreynt [365] ¶ right so fareth it som tyme of dedly synne / & of anoyouse venials synnes / whan they multiplie in a man so gretly / þat thilke worldly thynges þat he loueth / thurgh which he synneth venially / is as gret in his herte / as the loue of [folio 245a] god / or moore / [366]
