[6-text p 193]
¶ The bryddes synge / it is no nay
The Sperhauk and the Popyniay
That ioye / it was to here
Line 1958
The Thurstelock / made eek his lay
The wodedowue / vp on the spray
She sang ful loude & clere
Line 1961
¶ Sire Thopas fil / in loue longynge
Al whan he herde / the thrustel synge
And pryked / as he were wood
Line 1964
His fayre Steede / in his prikynge
So swatte / þat men myghte hym wrynge
His sydes / were al blood
Line 1967
¶ Sir Thopas eek / so wery was
ffor prikyng/ on the softe gras
So fiers / was his corrage
Line 1970
That doun he leyde hym / in the plas
To make his Steede / som solas
And yaf hym / good forage
Line 1973
¶ O Seinte Marie / benedicite
What eyleth / this loue at me
To bynde me / so soore
Line 1976
Me dremed / al this nyght pardee
An Elf queene / shal my lemman be
And slepe / vnder my gore
Line 1979
¶ An Elf queene / wol I haue ywys
ffor in this world / no womman is
Worthy to be my make //
Line 1982
in towne
Alle othere wommen / I forsake
And to an Elf queene / I me take
by dale / and eek by downe
Line 1986
