¶ The myry talkyng of the Hoost to the Phisicien and the Pardoner.
Oure Hoost gan to swere / as he were wood
Harrow quod he / by nayles and by blood
Line 288
This was a fals cherl / and a fals Iustise
As shameful deeth / as herte may deuyse
Come to thise Iuges / and hir Aduocatz
Algate this sely made / is slayn allas
Line 292
Allas / to deere boghte she beautee
Wherfore I seye alday / þat men may se
That yiftes of ffortune / and of nature
Been cause of deeth / to many a creature
Line 296
. . . . .
. . . . . [no gap in the MS.]
Of bothe yiftes / þat I speke of now
Men han ful ofte / moore for harm than prow
Line 300
¶ But trewely / myn owene maister deere
This is a pitous tale / for to heere
But nathelees passe ouer / is no fors
I pray to god / so saue thy gentil cors
Line 304
And eek thyne vrynals / and thy Iurdones
Thyn Ypocras / and eek thy galyones
And euery boyste / ful of thy letuarie
God blesse hem / and oure lady Seinte Marie
Line 308
So mote I then / thow art a propre man
And lyk a prelat / by Seint Ronyan
Seyde I nat wel / I kan nat speke in terme [folio 195b]
But wel I woot thow doost myn herte to erme
Line 312
That I almoost haue caught a Cardynacle
By corpus bones / but if I haue triacle
Or ellis a draghte / of moyste and corny ale
Or but I heere anon / a murye tale
Line 316
