[6-text p 413]
If that thow vouche sauf / what so bityde
Thy doghter wol I take / er that I wende
As for my wyf/ vn to my lyues ende
Line 308
¶ Thow louest me / I woot it wel certeyn [folio 178a]
Line 309
And art my feithful lige man ybore
And al that liketh me / I dar wel seyn
It liketh thee / and specially ther fore
Line 312
Tel me that point/ that I haue seyd bifore
If that thow wolt vn to that purpos drawe
To take me / as for thy sone in lawe
Line 315
¶ The sodeyn cas / this man astoneyd so
Line 316
That reed he weex abayst and al quakyng
He stood / vnnethe seyde he wordes mo
But oonly this / lord quod he / my willyng
Line 319
Is as ye wole / ne ayeins youre likyng
I wol no thyng ye be my lord so deere
Right as yow list/ gouerneth this matere
Line 322
¶ Yet wol I / quod this Markys / softely
Line 323
That in thy chambre / .I. and thow. and she
Haue a collacion / and wostow why
ffor .I wol aske / if it hir wille be
Line 326
To be my wyf / and rule hire after me
And al this shal be doon / in thy presence
I wol noght speke / out of thyn audience
Line 329
¶ And in the chambre / whil they were aboute
Line 330
Hir tretys / which as ye shal after heere
The peple cam / vn to the hous with oute
And wondred hem / in how honeste manere
Line 333
And tentifly / she kepte hir fader deere
But outrely / Grisildis wondre myghte
ffor neuere eft ne saw she swich a sighte
Line 336
