[Nebuchadnezzar.]
The myghty trone / the precious tresor / [Nabugodonosor]
The glorious ceptre / and roial maiestee
That hadde / the kyng Nabugodonosor
With tonge / vnnethe / may discryued be
Line 3336
He twies / wan Ierusalem the Citee
The vessel of the temple / he with hym ladde
At Babiloigne / was his souereyn see
In which / his glorie / and his delit he hadde
Line 3340
¶ The faireste children / of the blood roial
Of Israel / he leet do gelde anon
And maked ech of hem / to been his thral
Amonges othere / Danyel was oon
Line 3344
That was / the wiseste child of euerychoon
ffor he the dremes / of the kyng expowned
Ther as in Chaldeye / clerk/ ne was ther noon
That wiste / to what fyn his dremes sowned
Line 3348
¶ This proude kyng leet make a Statue of gold
Sixty cubites long and Seuene in brede
To which ymage / he bothe yong and old
Comanded to loute / and haue in drede
Line 3352
Or in a fourneys / ful of flambes rede
He shal be brend / that wolde noght obeye
But neuere / wolde assente to that dede
Danyel / ne hise yonge felawes tweye
Line 3356
¶ This kyng of kynges / proud was and elat [folio 91b]
He wende / that god / þat sit in magestee
Ne myghte hym nat bireue / of his estat
But sodeynly / he loste his dignytee
Line 3360
And lyk a beest hym semed for to be
And eet hey as an Oxe / and lay ther oute
In reyn / with wilde beestes walked he
Til certeyn tyme / was ycome aboute
Line 3364
