[6-text p 339]
¶ Abyd quod she / my tale is nat bigonne
Nay / thow shalt drynken / of another tonne
Er þat I go / shal sauoure wors than Ale
And whan that I / haue toold thee forth my tale
Line 172
Of tribulacion / in maryage
Of which I am expert in al myn age
This is to seye / my self hath been the whippe
Thanne maystow / chese / wheither þat thow wolt sippe
Of thilke tonne / that I shal abroche
Line 177
Be war of it / er thow to neigh approche
ffor I shal telle ensamples / mo than ten
Who so þat nyle / be war/ by othere men
Line 180
By hym / shal othere men corrected be
Thise same wordes / writeth Protholome
Rede in his Almageste / and take it there
¶ Dame I wolde pray yow / if youre wyl it were
Line 184
Seyde this Pardoner / as ye bigan
Telle forth youre tale / spareth for no man
And techeth vs yonge men / of youre praktyke
¶ Gladly quod she / syn it may yow lyke
Line 188
But that I praye / to al this compaignye
If that I speke / after my fantasye
As taketh nat agrief / of that I seye
ffor myn entente / nys but for to pleye
Line 192
Now sire / thanne wol I telle yow forth my tale
As euere / moot I drynke / wyn or Ale
I shal seye sooth / tho housbondes þat I hadde
As three of hem were goode / and two were badde
Line 196
The thre men / were goode / and ryche / and olde [folio 60b]
Vnnethe myghte they / the Statut holde
In which / that they were bounden vn-to me
Ye woot wel / what I mene of this pardee
Line 200
As help me god / I laughe whan I thynke
How pitously / a nyght I made hem swynke
And by my fey / I tolde of it no stoor
They hadde me yeuen / hir land and hir tresoor
Line 204
