[6-text p 585]
fful giltlees / that dorste I swere ywys
Line 277
O rakel hand / to doon so foule amys
O trouble wit o Ire recchelees
That vnauysed / smyteth giltles
Line 280
O wantrust . ful of fals suspecion
Where was thy wit and thy discrecion
O euery man / be war of rakelnesse
Ne trowe no thyng with-outen strong witnesse
Line 284
Smyt nat to soone / er þat ye witen why
And beeth auysed / wel and sobrely
Er ye doon / any execucion
Vp on youre Ire / for suspecion
Line 288
Allas / a thousand folk hath rakel Ire
ffully fordoon / and broght hem in the Mire
Allas / for sorwe .I wol my seluen slee
¶ And to the Crowe / o false theef seyde he
Line 292
I wol thee quite anon / thy false tale
Thou songe whilom / lyk a nyghtyngale
Now shaltow false theef thy song forgon
And eek thy white fetheres euerichon
Line 296
Ne neuere in al thy lif/ ne shaltou speke
Thus shal men / on a traytour been awreke
Thou / and thyn of-spryng/ euere shul be blake
Ne neuere / sweete voys shul ye make
Line 300
But euere crie / agayn tempest and rayn
In tokenynge / þat thurgh thee / my wyf is slayn
And to the Crowe / he stirte / and that anon
And pulled / hise white fetheres euerychon
Line 304
And made hym blak and refte hym al his song
And eek his speche / and out at dore hym slong
Vn-to the deuel / which I hym bitake
And for this caas / been alle Crowes blake
Line 308
LOrdynges / by this ensample I yow preye
Beth war / and taketh kepe what I seye
Ne telleth neuere / no man in youre lyf
How þat another man / hath dight his wyf /
Line 312
