[6-text p 557]
And if a man / wole aske hem pryuely
Why they been clothed / so vnthriftily
Line 893
They right anon / wol rownen in his ere
And seyn / þat if þat they espied were
Men wolde hem slee / by cause of hir science [folio 200a]
Lo / thus / this folk bitrayen Innocence
Line 897
Passe ouer this / I go my tale vn-to
Er þat the pot be on the fir ydo
Of metals / with a certeyn quantitee
My lord hem tempreth / and no man but he
Line 901
Now he is goon / I dare seyn boldely
ffor as men seyn / he kan doon craftily
Algate I woot wel / he hath swich a name
And yet ful oft / he renneth in a blame
Line 905
And wite ye how / ful ofte it happeth so
The pot tobreketh / and farewel al is go
Thise Metals / been of so greet violence
Oure walles / mowe nat make hem resistence
Line 909
But if they weren wroght/ of lym and stoon
They percen so / and thurgh the wal they goon
And somme of hem / synke in to the ground
Thus han we lost by tymes many a pound
Line 913
And somme are scatered / al the floor aboute
Somme lepte in-to the roof with-outen doute
Though þat the feend / noght in oure sighte hym shewe
I trowe he with vs be / that ilke shrewe
Line 917
In helle / where þat he lord is and sire
Nis ther moore wo / ne moore rancour ne Ire
Whan that oure pot is broke / as I haue sayd
Euery man chit and halt hym yuele apayd
Line 921
¶ Somme seyde / it was along on the fir makyng
Somme seyde nay / it was on the blowyng
Thanne was I fered / for that was myn office
¶ Straw quod the thridde / ye been lewed and nyce
Line 925
It was nat tempred as it oghte be
¶ Nay quod the fourthe / stynt and herkne me
