[6-text p 555]
The seuene spirites / and the bodies seuene
By ordre / as ofte I herde my lord hem neuene
Line 821
¶ The firste spirit quyk siluer called is
The seconde Orpyment the thridde ywis
Sal Armonyak / and the ferthe Brymstoon
The bodyes seuene eek/. lo hem heere anoon
Line 825
¶ Sol gold is / and Luna / siluer we threpe
Mars Iren / Mercurie quyk siluer we clepe
Saturnus leed / and Iuppiter is tyn
And Venus Coper / by my fader kyn
Line 829
¶ This cursed craft/ who so wole excercise
He shal no good han / þat hym may suffise
ffor al the good / he spendeth ther aboute
He lese shal / ther-of haue I no doute
Line 833
Who that listeth / outen his folie
Lat hym come forth / and lerne multiplie
And euery man / that oght hath in his cofre
Lat hym appiere / and wexe a Philosophre
Line 837
Ascauns / that craft is so light to leere
Nay nay god woot al be he Monk or frere
Preest or Chanon / or any oother wyght
Though he sitte at his book bothe day and nyght
Line 841
In lernyng of this Eluysshe nyce loore
Al is in veyn / and parde muchel moore
To lerne a lewed man this subtiltee
ffy spek nat ther-of / for it wol nat bee
Line 845
And konne he letterure / or konne he noon
As in effect. he shal fynde it al oon
ffor bothe / two / by my sauacion [folio 199b]
Concluden in multiplicacion
Line 849
Ylike wel / whan they han al ydo
This is to seyn / they faillen bothe two
Yet/ forgat I / to maken rehersaille
Of watres corosif / and of lymaille
Line 853
And of bodies mollificacion
And also / of hire induracion
