[6-text p 554]
¶ Ther is also / ful many another thyng
That is / vn-to oure craft apertenyng
Line 785
Though I by ordre / hem nat reherce kan
By cause / that I am a lewed man
yet wol I telle hem / as they come to mynde
Thogh I ne kan nat sette hem in hir kynde
Line 789
As Boole / armonyak vertgrees / Boras
And sondry vessels / maad of erthe and glas
Oure vrynals / and our descensories
Violes / crosletz / and sublymatories
Line 793
Cucurbites / and Alambikes eek
And othere swiche / deere ynough a leek
Nat nedeth it for to reherce hem alle
Watres rubifiyng and Boles galle
Line 797
Arsenyk / sal Armonyak and Brymstoon
And herbes / koude I telle eek many oon
As Egremoyne / Valerian / and lunarie [folio 199a]
And othere swiche / if that me liste tarie
Line 801
Oure lampes brennyng bothe nyght and day
To brynge aboute / oure purpos / if we may
Oure fourneys eek / of Calcinacion
And of watres Albificacion
Line 805
Vnslekked lym / Chalk / and gleyre of an ey
Poudres diuerse / asshes / donge / pisse / and cley
Cered pottes / sal Peter / vitriole
And diuerse fires / maad of wode and cole
Line 809
Sal tartre / Alkaly / and sal preparat/
And combust matires / and coagulat
Cley / maad with hors / and mannes heer and oille
Of Tartre / Alum glas / berme / wort and argoille
Line 813
Resalgar / and oure matires enbibyng
And eek of oure matires encorporyng
And of oure siluer citrinacion
And of oure cementyng and fermentacion
Line 817
Oure yngottes / testes / and many mo
I wol yow telle / as was me taught also
