[6-text p 532]
(20)
And whil the Orgues / maden melodie
Line 134
To god allone / in herte thus sang she
O lord / my soule / and eek my body gye
Vnwemmed / lest that it confounded be
Line 137
And for his loue / that dyde / vp-on a tree
Euery seconde / and thridde day she faste
Ay biddynge / in hire orisons ful faste
Line 140
(21)
The nyght cam / and to bedde moste she gon
Line 141
With hire housbonde / as ofte is the manere
And pryuely / to hym she seyde anon
O sweete / and wel biloued spouse deere
Line 144
Ther is a conseil / and ye wolde it heere
Which that right fayn / I wolde vn-to yow seye
So that ye swere / ye shul me nat biwreye
Line 147
(22)
¶ Valerian / gan faste vn-to hire swere [folio 191b]
That for no cas / ne thyng/ that myghte be
He sholde neuere mo / biwreyen here
And thanne at erst to hym thus seyde she
Line 151
I haue an Aungel / which that loueth me
That with greet loue / wher so I wake or sleepe
Is redy ay / my body for to kepe
Line 154
(23)
And if he / may feelen out of drede
Line 155
That ye me touche // or loue in vileynye
He right anon / wol sle yow with the dede
And in youre yowthe / thus ye sholden dye
Line 158
And if that ye / in clene loue me gye
He wol yow louen as me / for youre clennesse
And shewen yow / his ioye and his brightnesse
Line 161
