¶ Bihoold the murye wordes of the Hoost to Chaucer . [on leaf 155]
WHan seyd was al this miracle / euery man
As sobre was / that wonder was to se
Til that oure hoost Iapen to bigan [.s. Chaucer]
And thanne at erst he looked vp on me
Line 1884
And seyde thus / what man artow quod he?
Thou lookest as thou woldest fynde an hare
ffor euere / vp on the ground / I se thee stare
Line 1887
Approche neer / and looke vp murily [folio 155b]
Now war yow sires / and lat this man haue place
He in the waast is shape / as wel as .I. [.i. henry Bailly]
This were a popet in an Arm tenbrace
Line 1891
ffor any womman smal / and fair of face
He semeth eluyssh / by his contenance
ffor vn to no wight / dooth he daliance
Line 1894
Sey now somwhat syn oother folk han sayd
Telle vs a tale / of myrthe / and that anon
Hoost quod I / ne beth nat yuele apayd
ffor oother tale / certes kan I noon
Line 1898
But of a rym / I lerned longe agoon [.i. hoost]
Ye that is good quod he / now shul ye heere
Som deyntee thyng me thynketh by his cheere
Line 1901
¶ Explicit .
