[6-text p 189]
My litel child / now wol I fecche thee
Whan þat the greyn / is fro thy tonge ytake
Be nat agast I wol thee nat forsake
Line 1859
¶ This hooly Monk this Abbot hym meene I
His tonge out caughte / and took a-wey the greyn
And he yaf vp the goost ful softely
And whan this Abbot hadde this wonder seyn
Line 1863
Hise salte teeris / trikled doun as reyn
And gruf he fil / al plat vp on the grounde
And stille he lay / as he had leyn ybounde
Line 1866
The Couent eek / lay on the pauement
Wepynge / and heryen cristes mooder deere
And after that / they ryse and forth been went
And tooken awey / this martir from his beere
Line 1870
And in a temple / of Marbul stones cleere
Enclosen they / his litel body sweete
Ther he is now / god leue us alle for to meete
Line 1873
¶ O yonge Hugh of Lyncoln slayn also
With cursed Iewes / as it is notable
ffor it is / but a litel while ago
Preye eek / for vs / we synful folk vnstable
Line 1877
That of his mercy / god so merciable
On vs / his grete mercy multiplie
ffor reuerence / of his mooder Marie Amen .
Line 1880
¶ Heere is ended / the Prioresses Tale .
