[6-text p 186]
I seye / that in a wardrobe / they hym threwe
Where as thise Iewes / purgen hire entraille
O cursed folk / of Herodes al newe
What may youre yuel entente yow auaille
Line 1765
Mordre wol out certeyn / it wol nat faille
And namely / ther thonour of god shal sprede
The blood out crieth / on youre cursed dede
Line 1768
¶ O martir / sowded to virginitee [folio 154a]
Now maystow syngen / folwynge euere in oon
The white lamb celestial quod she
Of which / the grete Euaungelist Seint Iohn
Line 1772
In Pathmos wroot which seith / þat they þat goon
Biforn this lamb / and synge a song al newe [i. carnaliter]
That neuere fleshly / wommen they ne knewe
Line 1775
¶ This poure wydwe / awaiteth al that nyght
After hir litel child / but he cam noght
ffor which as soone / as it was dayes lyght
With face pale of drede / and bisy thoght
Line 1779
She hath at scole / and elles where hym soght
Til finally / she gan so fer espie
That he / last seyn was in the Iuerie
Line 1782
With moodres pitee / in hir brest enclosed
She gooth / as she were half / out of hir mynde
To euery place / where she hath supposed
By liklihede / hir litel child to fynde
Line 1786
And euere / on Cristes mooder/ meeke and kynde
She cride / and atte laste / thus she wroghte
Among the cursed Iues / she hym soghte
Line 1789
She frayneth / and she preyeth pitously
To euery Iew / þat dwelte in thilke place
To telle hire / if hir child / wente oght forby
They seyde nay / but Ihesu of his grace
Line 1793
