[6-text p 185]
Though þat / I for my prymer shal be shent
And shal be beten / thries in an houre
I wol it konne / oure lady for to honoure
Line 1733
His felawe / taughte hym homward priuely
ffro day to day / til he koude it by rote
And thanne / he song it wel and boldely
ffro word to word to word acordynge with the note
Line 1737
Twies a day / it passed thurgh his throte
To scoleward and homward whan he wente
On cristes mooder / set was his entente
Line 1740
¶ As I haue seyd / thurgh out the Iuerie
This litel child / as he cam to and fro
fful murily / wolde he synge and crie
O Alma redemptoris / euere mo
Line 1744
The swetnesse / his herte perced so
Of cristes mooder / that to hire to preye
He kan nat stynte / of syngyng by the weye
Line 1747
Ovre firste foo / the serpent Sathanas [¶ Auctor]
That hath / in Iues herte his waspes nest
Vp swal / and seide / o. hebrayk peple allas
Is this to yow / a thyng þat is honest
Line 1751
That swich a boy / shal walken as hym lest
In youre despit and synge of swich sentence
Which is / agayn oure lawes reuerence
Line 1754
ffro thennes forth / the Iues han conspired
This Innocent out of this world to chace
An homycide / ther to / han they hyred
That in an Aleye / hadde a priuee place
Line 1758
And as the child / gan forby for to pace
This cursed Iew hym hente / and heeld hym faste
And kitte his throte / and in a pit hym caste
Line 1761
