[6-text p 330]
And with that word / it happed hym par cas
To take the botel / ther the poyson was
And drank and yaf his felawe drynke also
ffor which anon / they storuen bothe two
Line 888
¶ But certes I suppose / that Auycen
Wroot neuere in no Canon / ne in no fen
Mo wonder signes / of empoisonyng
Than hadde thise wrecches two / er hir endyng
Line 892
Thus ended been / thise homycides two
And eek the false empoysonere also
¶ O cursed synne / of alle cursednesse [¶ Auctor]
O traytours homycide .o. wikkednesse
Line 896
O glotonye / luxurie / and hasardrye
Thou blasphemour of Crist with vileynye
And othes grete / of vsage / and of pride
Allas mankynde / how may it bitide
Line 900
That to thy creatour / which þat the wroghte
And with his precious herte-blood thee boghte
Thou art so fals / and so vnkynde allas
¶ Now goode men / god foryeue yow youre trespas
Line 904
And ware yow / fro the synne of Auarice
Myn hooly pardon / may yow alle warice
So þat ye offre / nobles / or sterlynges
Or elles siluer broches / spoones / rynges
Line 908
Boweth youre heed / vnder this hooly bulle
Com vp ye wyues / offreth of youre wolle
Youre names / I entre heer/ in my rolle anon
In-to the blisse of heueue / shul ye gon
Line 912
I yow assoille / by myn heigh power
Yow þat wol offre / as clene and eek as cleer
As ye were born / and lo sires thus I preche
And Ihesu crist that is oure soules leche
Line 916
So graunte yow / his pardon to receyue
ffor that is best I wol yow nat deceyue
But sires / o. word / forgat I in my tale
I haue Relikes / and pardon in my male
Line 920
