[6-text p 321]
He kan no conseil kepe / it is no drede
Now kepe yow / fro the white and fro the rede
And namely / fro the white wyn of lepe
That is to selle / in ffysshstrete / or in Chepe
Line 564
This wyn of Spaigne / crepeth subtilly
In othere wynes / growynge faste by
Of which ther ryseth swich fumositee
That whan a man hath dronken draughtes thre
Line 568
And weneth / that he be at hoom in Chepe
He is in Spaigne / right at the toune of lepe
Nat at the Rochele / ne at Burdeux toun
And thanne wol he seye / Sampsoun Sampsoun
Line 572
¶ But herkneth lordes / o word I yow preye
That alle the souereyn Actes dar I seye
Of victories / in the olde testament
Thurgh verray god / þat is omnipotent
Line 576
Were doon in Abstinence / and in preyere
Looketh the Bible / and ther ye may it leere
¶ Looke Attilla the grete Conquerour
Deyde in his sleepe / with shame and dishonour
Line 580
Bledynge ay at his nose in dronkenesse
A Capitayn / sholde lyue in sobrenesse
And ouer al this / auyseth yow right wel
What was comaunded / vn to Lamwel [¶ Noli vinum dare]
Line 584
Nat Samuel / but Lamwel seye I
Redeth the Bible / and fynde it expresly
Of wyn yeuyng to hem þat han Iustise
Namoore of this / for it may wel suffise
Line 588
ANd now I haue spoken of Glotonye [folio 143b]
Now wol I yow / deffenden hasardrye [¶ Of Hasardrye]
Hasard / is verray mooder of lesynges [¶ Policratici [Ioannis Saris|buriensis] libro .1o. / Menda|ciorum & periuriarum mater est Alea.]
And of deceite / and cursed forswerynges
Blasphemyng of crist manslaughtre and wast also
Of catel and of tyme / and forthermo
It is repreeue / and contrarie of honour
ffor to ben holde / a commune hasardour
Line 596
