[6-text p 309]
Moste by force / his deere doghter yeuen
Vn-to the Iuge / in lecherie to lyuen
He gooth hym hoom / and sette him in his halle
And leet anon / his deere doghter calle
Line 208
And with a face deed / as asshen colde
Vpon hir humble face / he gan biholde
With fadres pitee / stikynge thurgh his herte
Al wolde he / from his purpos nat conuerte
Line 212
Doghter quod he / Virginia / by thy name
Ther been two weyes / outher deeth or shame
That thou most / suffre / allas þat I was bore
ffor neuere / thou deseruedest wherfore
Line 216
To dyen / with a swerd / or with a knyf
O deere doghter / endere of my lyf
Which I haue fostred vp / with swich plesance
That thou were neuere / out of my remembrance
Line 220
O doghter / which þat art my laste wo
And in my lyf my laste ioye also
O gemme o Chastitee in pacience [folio 139b]
Take thou thy deeth / for this is my sentence
Line 224
ffor loue and nat for hate / thou most be deed
My pitous hand / moot smyten of thyn heed
Allas / that euere Apius the say
Thus hath he falsly / Iugged the to day
Line 228
And tolde hire al the cas / as ye bifore
Han herd / nat nedeth for to telle it moore
¶ O mercy deere fader / quod this mayde
And with that word / she both hir Armes layde
Line 232
About his nekke / as she was wont to do
The teeris / bruste out of hir eyen two
And seyde / goode fader shal I dye
Is ther no grace / is ther no remedye
Line 236
¶ No certes / deere doghter myn quod he
¶ Thanne yif me leyser / fader myn quod she
My deeth for to compleyne / a litel space
ffor pardee Iepte yaf his doghter grace [¶ Iudicum capitulo .xj.o]
Line 240
