[6-text p 522]
And bryngeth hire / to swich a place anon
They take hir leue / and on hir wey they gon
But they ne wiste / why she thider wente
He nolde / no wight tellen his entente
Line 1492
¶ Parauenture / an heepe of yow ywis
Wol holden hym / a lewed man in this
That he wol putte / his wyf in Iupartie
Herkneth the tale / er ye vp on hire crie
Line 1496
She may haue bettre ffortune / than yow semeth
And whan þat ye han herd the tale / demeth
This squier / which þat highte Aurelius
On Dorigen / that was so amorus
Line 1500
Of auenture / happed hire to meete
Amydde the toun / right in the quykkest strete
As she was bown / to goon the wey forth right
Toward the gardyn / ther as she had hight
Line 1504
And he was / to the gardynward also
ffor wel he spyed / whan she wolde go
Out of hir hous / to any maner place
But thus they mette / of auenture or grace
Line 1508
And he saleweth hire / with glad entente
And asked of hire / whiderward she wente
¶ And she answerde / half as she were mad
Vn to the gardyn / as myn housbonde bad
Line 1512
My trouthe for to holde / allas / allas
¶ Aurelius / gan wondren on this cas
And in his herte / hadde greet compassion
Of hire / and of hire lamentacion
Line 1516
¶ And of Arueragus the worthy knyght [folio 136a]
That bad hire holden / al þat she had hight
So looth hym was / his wyf sholde breke hir trouthe
And in his herte / he caughte of this greet routhe
Line 1520
Considerynge / the beste on euery syde
That fro his lust yet were hym leuere abyde
Than doon / so heigh a cherlyssh wrecchednesse
Agayns franchise / and alle gentillesse
Line 1524
