[6-text p 518]
It is / agayns the proces of nature
And hoom she goth / a sorweful creature
ffor verray feere / vnnethe may she go
She wepeth / wailleth / al a day or two
Line 1348
And swowneth / that it routhe was to see
But why it was / to no wight tolde shee
ffor out of towne / was goon Arueragus
But to hir self/ she spak and seyde thus
Line 1352
With face pale / and with ful sorweful cheere
In hire compleynt as ye shal after heere [¶ The compleynt/ of Dorigene ayeyns ffortune]
¶ Allas quod she / on thee ffortune I pleyne
That vnwar / wrapped hast me in thy cheyne
Line 1356
ffor which tescape / woot I no scour
Saue oonly / deeth or dishonour
Oon of thise two / bihoueth me to chese
But nathelees / yet haue I leuere to lese
Line 1360
My lif/ than of my body haue a shame
Or knowe my seluen fals / or lese my name
And with my deth / I may be quyt ywis
Hath ther nat/ many a noble wyf er this [¶ 30a. Atheniensium tiranni cum Phidonem necassent/ in con|uiuio filias eius virgines ad se venire iusserunt & scortorum more nudari / ac super pauimenta patris sanguine cruentatas inpudicis gestibus ludere ‖ que paulisper dissimulato dolore cum timulentos conuiuas cernerent quasi ad requisita nature egredientes inuicem se complexē precipitauerunt in puteum vt virginitatem morte ser|uarent/ ]
And many a mayde / yslayn hir self allas
Rather / than with hir body doon trespas
¶ Yis certes / lo thise stories beren witnesse
Whan .xxx. tirauntz / ful of cursednesse
Line 1368
Hadde slayn Phidon / in Atthenes at feste
They comanded / hise doghtres for tareste
And bryngen hem / biforn hem in despit
Al naked / to fulfille hir foul delit
Line 1372
And in hir fadres blood / they made hem daunce [folio 134b]
Vpon the pauement god yeue hem myschaunce
ffor which / thise woful maydens ful of drede
Rather / than they wolde lese hir maydenhede
Line 1376
They priuely / been stirt/ in to a welle
And dreynte hem seluen / as the bookes telle
They of Mecene / leete enquere and seke [¶ Cum .50a. vir|gines lacedoniorum Messeni violare temptassent / .]
Of Lacedomye / fifty maydens eke
