[6-text p 511]
That loueth thee / as his owene hertes lyf
No thyng list hym / to been ymaginatyf
If any wight had spoke / whil he was oute
To hire of loue / he hadde of it no doute
Line 1096
He noght entendeth / to no swich mateere
But daunceth / Iusteth / maketh hire good cheere
And thus / in ioye and blisse / I lete hem dwelle
And of the sike Aurelius / I wol yow telle
Line 1100
IN langour/ and in torment furyus
Two yeer and moore / lay wrecche Aurelyus
Er any foot . he myghte on erthe gon
Ne confort in this tyme / hadde he noon
Line 1104
Saue of his brother / which þat was a clerk
He knew of al this wo / and al this werk
ffor to noon oother creature certeyn
Of this matere / he dorste no word seyn
Line 1108
Vnder his brest he baar it moore secree
Than euere dide Pamphilus for Galathee [¶ Pamphilus ad Galatheam / vulneror & clausum porto sub pectore telum & cetera]
His brest was hool / with oute for to sene
But in his herte / ay was the Arwe kene
Line 1112
And wel ye knowe / that of a Sursanure
In Surgerye / is perilous the cure
But men myghte touche the Arwe / or come therby
His brother / weepe / and wayled pryuely
Line 1116
Til atte laste / hym fil in remembrance
That whiles he was / at Orliens in ffrance
As yonge clerkes / that been lykerous
To reden Artes / that been curious
Line 1120
Seken / in euery halke / and euery herne
Particuler sciences / for to lerne
He hym remembred / that vpon a day
At Orliens in studie / a book he say
Line 1124
Of Magyk/ natureel / which his felawe
That was that tyme / a Bacheler of lawe
Al were he ther / to lerne another craft
Hadde priuely / vpon his desk ylaft
Line 1128
