[6-text p 510]
That now next at this opposicion
Which in the signe / shal be of the leon
As preieth hire / so greet a flood to brynge
That fyue fadme at the leeste it ouersprynge
Line 1060
The hyeste Rokke / in Armorik / Briteyne
And lat this flood / endure yeres tweyne
Thanne certes / to my lady may I seye
Holdeth youre heste / the Rokkes been aweye
Line 1064
¶ Lord Phebus / dooth this miracle for me
Preye hire / she go no faster cours than ye
I seye / preyeth your suster / that she go
No faster cours than ye / thise yeres two
Line 1068
Thanne shal she been / euene atte fulle alway
And spryng flood / laste bothe nyght and day
And but she vouche sauf / in swich manere
To graunte me / my souereyn lady deere
Line 1072
Prey hire / to synken euery Rok adoun
In to / hir owene dirke Regioun
Vnder the ground / ther Pluto dwelleth Inne
Or neuere mo / shal I my lady wynne
Line 1076
Thy Temple in Delphos / wol I barefoot seke
Lord Phebus / se the teeris on my cheke
And of my peyne / haue som compassioun
And with that word / in swowne he fil adoun
Line 1080
And longe tyme / he lay forth in a traunce
¶ His brother/ which þat knew of his penaunce
Vp caughte hym / and to bedde he hath hym broght
Dispeyred / in this torment and this thoght
Line 1084
Lete I / this woful creature lye [folio 131b]
Chese he for me / wheither he wol lyue or dye
Arueragus / with heele and greet honour
As he / þat was / of chiualrie the flour
Line 1088
Is comen hoom / and othere worthy men
O blisful / artow now / thou Dorigen
That hast thy lusty housbonde in thyne Armes
The fresshe knyght the worthy man of Armes
Line 1092
