[6-text p 488]
Though al the world / the contrarie hadde yswore
He shal nat thennes / been ydrawe nor ybore
Or if yow list bidde hym thennes goon
Trille this pyn / and he wol vanysshe anoon
Line 328
Out of the sighte / of euery maner wight
And come agayn / be it day or nyght
Whan þat yow list to clepen hym ageyn
In swich a gyse / as I shal to yow seyn
Line 332
Bitwixe yow and me / and that ful soone
Ride whan yow list ther is namoore to doone
¶ Enformed / whan the kyng was/ of that knyght
And hath conceyued / in his wit aright
Line 336
The manere / and the forme / of al this thyng
Thus glad and blithe / this noble kyng
Repeireth to his reuel / as biforn [folio 123a]
¶ The brydel / is / vn to the tour yborn
Line 340
And kept among hise Iueles / leeue and deere
The hors vanysshed I noot/ in what manere
Out of hir sighte / ye gete namoore of me
But thus I lete / in lust and Iolitee
Line 344
This Cambynskan / hise lordes festeiynge
Til wel ny / the day bigan to sprynge
¶ Explicit prima pars .
¶ Sequitur pars secunda .
The Norice of digestioun / the sleepe
Gan on hem wynke / and bad hem taken keepe
That muchel drynke / and labour wolde han reste
And with a galpyng mouth / hem alle he keste
And seyde / it was tyme to lye adoun
ffor blood / was in his domynacioun
Line 352
Cherisseth blood / natures freend quod he
They thanken hym galpynge / by two / by thre
And euery wight / gan drawe hym to his reste
As sleepe hem bad / they tooke it for the beste
Line 356
