[6-text p 484]
The hors of bras / þat may nat be remewed
It stant as it were / to the ground yglewed
Ther may no man / out of the place it dryue
ffor noon engyn / of wyndas ne polyue
Line 184
And cause why?/ for they kan nat the craft
And therfore / in the place / they han it laft
Til þat the knyght hath taught hem the manere
To voyden hym / as ye shal after heere
Line 188
Greet was the prees / þat swarmeth to and fro
To gauren on this hors / that stondeth so
ffor it so heigh was / and so brood and long
So wel proporcioned / for to been strong
Line 192
Right as it were / a steede of Lumbardye
Ther-with so horsly / and so quyk of eye
As it a gentil Poilleys Courser were [folio 121b]
ffor certes / fro his tayl / vn to his ere
Line 196
Nature ne Art ne koude hym nat amende
In no degree / as al the peple wende
But eueremoore / hir mooste wonder was
How þat it koude go / and was of bras
Line 200
It was a ffairye / as al the peple semed
Diuerse folk / diuersely they demed
As many heddes / as manye wittes ther been
They murmureden / as dooth a swarm of Been
Line 204
And maden skiles / after hir fantasies
Rehersynge / of thise olde poetries
And seyde / that it was lyk the Pegasee [¶ .i. equs Pegaseus]
The hors / þat hadde wynges for to flee
Line 208
Or elles / it was the Grekes hors Synon
That broghte Troie to destruccion
As men / in thise olde geestes rede
¶ Myn herte quod oon / is eueremoore in drede
Line 212
I trowe / som men of Armes been ther Inne
That shapen hem / this Citee for to wynne
It were right good / þat al swich thyng were knowe
¶ Another rowned / to his felawe lowe
Line 216
