¶ Heere bigynneth / the Squieres tale . [on leaf 119, back]
AT Sarray / in the land of Tartarye
Ther dwelte a kyng that werreyed Russye
Thurgh which ther dyde / many a doughty man
This noble kyng was cleped Cambynskan [[MS more like Cam|byuskan all through]]
Which in his tyme / was of so greet renoun
That ther was / no wher in no Regioun [[Painting of the Squire on Horseback.]]
So excellent a lord / in alle thyng
Hym lakked noght that longeth to a kyng
Line 16
And of the secte / of which þat he was born
He kepte his lay / to which þat he was sworn
And ther to / he was hardy / wys and riche
And pitous and Iust alwey yliche
Line 20
Sooth of his word / benigne and honurable
Of his corage / as any Centre stable [¶ Centrum circuli]
Yong fressh / strong and in Armes desirous
As any Bacheler / of al his hous
Line 24
A fair persone he was / and fortunat
And kepte alwey / so wel roial estat
That ther was nowher / swich another man
¶ This noble kyng this Tartre Cambynskan
Line 28
Hadde two sones / on Elpheta his wyf
Of whiche / the eldeste highte Algarsyf
That oother sone / was cleped Cambalo
A doghter hadde / this worthy kyng also
Line 32
That yongest was / and highte Canacee
But for to telle yow / al hir beautee
It lyth nat in my tonge / nyn my konnyng
I dar nat vndertake / so heigh a thyng
Line 36
