[6-text p 470]
And with hir fynger / signes made she
That Damyan / sholde clymbe vp on a tree
That charged was with fruyt and vp he wente
ffor verraily / he knew al hire entente
Line 2212
And euery signe / þat she koude make
Wel bet than Ianuarie / hir owene make
ffor in a lettre / she hadde toold hym al [folio 117a]
Of this matere / how he werchen shal
Line 2216
And thus I lete hym sitte / vp on the pyrie
And Ianuarie and May romynge myrie
Bright was the day / and blew the firmament
Phebus hath of gold / hise stremes doun ysent
Line 2220
To gladen euery flour with his warmnesse
He was that tyme / in Geminis as I gesse
But litel / fro his declynacion
Of Cancer / Iouis exaltacion
Line 2224
And so bifel / that brighte morwe tyde
That in that gardyn / in the ferther syde
Pluto / that is kyng of ffairye
And many a lady / in his compaignye
Line 2228
ffolwynge his wyf / the queene Proserpyne
Ech after oother / right as a lyne
Whil þat she gadered / floures in the mede
In Claudyan / ye may the stories rede
Line 2232
And in his grisely Carte / he hire sette
This kyng of ffairye / thanne adoun hym sette
Vp on a bench of turues / fressh and grene
And right anon / thus seyde he to his queene
Line 2236
¶ My wyf quod he / ther may no wight seye nay
Thexperience / so preueth euery day
The tresons / whiche þat wommen doon to man
Ten hondred thousand / tellen I kan
Line 2240
Notable / of youre vntrouthe and brotilnesse
O Salomon / wys / and richest of richesse
ffulfild of sapience / and of worldly glorie
fful worthy been thy wordes to memorie
Line 2244
