[6-text p 462]
At after Noon / ye with youre wommen alle
Whan ye han been in chambre / out of this halle
That alle ye / go se this Damyan
Dooth hym disport/ he is a gentil man
Line 1924
And telleth hym / that I wol hym visite
Haue I no thyng but rested me a lite
And spede yow faste / for I wole abyde [folio 114a]
Til that ye slepe / faste by my syde
Line 1928
And with that word / he gan to hym to calle
A Squier / that was Marchal of his halle
And tolde hym certeyn thynges / what he wolde
¶ This fresshe May / hath streight hir wey yholde
Line 1932
With alle hir wommen / vn-to Damyan
Doun by his beddes syde / sit she than
Confortynge hym / as goodly as she may
This Damyan / whan that his tyme he say
Line 1936
In secree wise / his purs and eek his bille
In which þat he / ywriten hadde his wille
Hath put in to hire hand / with-outen moore
Saue þat he siketh / wonder depe and soore
Line 1940
And softely to hire / right thus seyde he
Mercy / and that ye nat discouere me
ffor I am deed / if that this thyng/ be kyd
This purs hath she / inwith hir bosom hyd
Line 1944
And wente hire wey / ye gete namoore of me
But vn-to Ianuarie / ycomen is she
That on his beddes syde / sit ful softe
He taketh hire / and kisseth hire ful ofte
Line 1948
And leyde hym doun to slepe / and that anon
She feyned hire / as that she moste gon
Ther as ye woot þat euery wight moot neede
And whan she of this bille / hath taken heede
Line 1952
She rente it/ al to cloutes atte laste
And in the pryuee / softely it caste
Who studieth now / but faire fresshe May
Adoun / by olde Ianuarie she lay
Line 1956
