[6-text p 458]
So soore / hath Venus hurt hym with hire brond
As þat she bar it daunsynge in hire hond
And to his bed / he wente hym hastily
Namoore of hym / at this tyme speke [I]
Line 1780
But there I lete hym wepe ynogh and pleyne
Til fresshe May / wol rewen on his peyne
Operilous fyr / that in the bedstraw bredeth [folio 112b] [¶ Auctor]
O famulier foo / that his seruyce bedeth
Line 1784
O seruant traytour / false hoomly hewe
Lyk to the naddre / in bosom sly vntrewe
God shilde vs alle / from youre aqueyntance
O Ianuarie / dronken in plesance
Line 1788
In mariage / se how thy Damyan
Thyn owene squier / and thy born man
Entendeth / for to do thee vileynye
God graunte thee / thyn hoomly fo tespye
Line 1792
ffor in this world / nys worse pestilence
Than hoomly foo / al day in thy presence
¶ Parfourned hath the sonne / his Ark diurne
No lenger / may the body of hym soiurne
Line 1796
On thorisonte / as in that latitude
Night with his Mantel þat is derk and rude
Gan ouersprede the Hemysperie aboute
ffor which / departed is / this lusty route
Line 1800
ffro Ianuarie / with thank on euery syde
Hoom to hir hous / Iustily they ryde
Where as they doon hir thynges / as hem leste
And whan they sye hir tyne / goon to reste
Line 1804
Soone after that this hastif Ianuarie
Wolde go to bedde / he wolde no lenger tarye
He drynketh Ypocras / Clarree and Vernage
Of spices hoote / tencreessen his corage
Line 1808
And many a letuarie / hath he ful fyn
Swiche as the Monk daun Constantyn
Hath writen / in his book de coitu
To eten hem alle / he nas no thyng eschu
Line 1812
