[6-text p 430]
And of youre newe wyf / god of his grace
Line 841
So graunte yow wele and prosperitee
ffor I wol gladly / yelden hire my place
In which that I was blisful wont to bee
Line 844
ffor sith it liketh yow / my lord quod shee
That whilom weren / al myn hertes reste
That I shal goon / I wol goon whan yow leste
Line 847
But ther as ye me profre / swich dowaire
Line 848
As I first broghte / it is wel in my mynde
It were my wrecched clothes no thyng faire
The whiche to me / were hard now for to fynde
Line 851
O goode god / how gentil and how kynde
Ye semed / by youre speche / and youre visage
The day / that maked was oure mariage
Line 854
But sooth is seyd / algate I fynde it trewe [folio 102a]
Line 855
ffor in effect it preeued is on me
Loue is noght oold / as whan þat it is newe
But certes lord / for noon aduersitee
Line 858
To dyen in the cas / it shal nat bee
That euere / in word or werk / I shal repente
That I yow yaf myn herte in hool entente
Line 861
My lord ye woot / that in my fadres place
Line 862
Ye dide me streepe / out of my poure weede
And richely / me cladden of youre grace
To yow broghte I noght elles / out of drede
Line 865
But feith and nakednesse / and maydenhede
And heere agayn / my clothyng I restoore
And eek / my weddyng ryng/ for eueremore
Line 868
The remenant of youre Iueles redy be
Line 869
In with youre chambre / dar I saufly sayn
Naked / out of my fadres hous quod she
I cam / and naked moot I turne agayn
Line 872
