[6-text p 428]
¶ Arrayed was toward hir mariage [folio 101a]
This fresshe mayde / ful of gemmes cleere
Hir brother / which þat .vij. yeer was of age
Arrayed eek / ful fressh in his manere
Line 781
And thus in greet noblesse / and with glad cheere
Toward Saluces / shapynge hir iourney
ffro day to day / they ryden in hir wey
Line 784
¶ Explicit quarta pars .
¶ Sequitur pars quinta .
Among al this / after his wikke vsage
Line 785
This Markys yet his wyf to tempte moore
To the outtreste preeue / of hir corage
ffully / to han experience and loore
Line 788
If that she were / as stidefast as bifoore
He on a day / in open audience
fful boistously haþ seyd hire this sentence
Line 791
¶ Certes Grisilde / I hadde ynogh plesance
Line 792
To han yow to my wyf /for youre goodnesse
As for youre trouthe / and for youre obeisance
Noght for youre lynage / ne for youre richesse
Line 795
But now knowe I / in verray soothfastnesse
That in greet lordshipe / if I wel auyse
Ther is greet seruitute / in sondry wyse
Line 798
I may nat doon / as euery Plowman may
Line 799
My peple / me constreyneth for to take
Another wyf/ and crien day by day
And eek the pope / rancour for to slake
Line 802
Consenteth it that dar I vndertake
And treweliche / thus muche I wol yow seye
My newe wyf is comynge by the weye
Line 805
Be strong of herte / and voyde anon hir place
Line 806
And thilke dowere / that ye broghten me
Taak it agayn / I graunte it of my grace
