[6-text p 400]
Now ete youre mete / and lat the cherl go pleye
Lat hym go honge hymself a deuel weye
¶ The wordes of the lordes Squier and his keruere / for departynge of the fart on twelue .
NOW stood the lordes Squier at the bord
That karf his mete / and herde word by word
Line 2244
Of alle thynges / whiche that I haue sayd
My lord quod he / beth nat yuele apayd
¶ I koude telle for a gowne clooth [folio 91a]
To yow sire frere / so ye be nat wrooth
Line 2248
How that this fart euene delt shal be
Among youre Couent if it lyked me
¶ Tel quod the lord / and thou shalt haue anon
A gowne clooth / by god / and by Seint Iohn
Line 2252
¶ My lord quod he / whan þat the weder is fair
With-outen wynd / or perturbynge of Air
Lat brynge a Cartwheel in-to this halle
But looke / that it haue his spokes alle
Line 2256
Twelue spokes / hath a Cartwheel comunly
And bryng me thanne .xij. freres woot ye why?
For twelue is a Couent/ as I gesse
The Confessour heere / for his worthynesse
Line 2260
Shal parfourne vp / the nombre of his Couent
Thanne shal they knele doun / by oon assent
And to euery spokes ende / in this manere
fful sadly / leye his nose shal a frere
Line 2264
Youre noble Confessour / there god hym saue
Shal holde his nose / vpright / vnder the Naue
Thanne shal this cherl / with bely stif and toght
As any Tabour / been hyder ybroght
Line 2268
And sette hym on the wheel / right of this Cart
Vpon the Naue / and make hym lete a fart
And ye shul seen / vp peril of my lyf/
By preeue / which that is demonstratif
Line 2272
