[6-text p 396]
Nedeth namoore / to speken of it seith he
But if me list/ of myn humylitee
¶ Yif me thanne of thy gold / to make oure cloystre
Quod he / for many a Muscle / and many an oystre
Line 2100
Whan othere men / han ben ful wel at eyse
Hath been oure foode / our cloystre for to reyse
And yet god woot vnnethe the fundement
Parfourned is / ne of our pauement
Line 2104
Nys nat a tyl yet/ with-Inne oure wones
By god / we owen fourty pound for stones
¶ Now help Thomas / for hym that harwed helle [folio 89b]
ffor elles / moste we oure bookes selle
Line 2108
And if ye lakke / oure predicacion
Thanne goth the world / al to destruccion
ffor who so wolde / vs fro this world bireue
So god me saue / Thomas by youre leue
Line 2112
He wolde bireue / out of this world the sonne
ffor who kan teche / and werchen as we konne
And that is nat of litel tyme quod he
But syn Ennok was / or Elise
Line 2116
Han freres been / that fynde I of record
In charitee / ythanked be oure lord
Now Thomas / helpe for seinte charitee
And doun anon / he sette hym on his knee
Line 2120
THis sike man / wax wel ny wood for Ire
He wolde / þat the frere / had been on fire
With his false dissymulacion
Swich thyng as is in my possession
Line 2124
Quod he / that may I yeuen / and noon oother
Ye sey me thus / that I am youre brother
¶ Ye certes quod the frere / trusteth weel
I took oure dame / oure lettre and oure seel
Line 2128
¶ Now wel quod he / and som what shal I yeue
Vn-to youre hooly Couent whil I lyue
And in thyn hand / thou shalt it haue anon
On this condicion / and oother noon
Line 2132
