¶ Heere bigynneth the Somonour his tale . [on leaf 85]
LOrdynges / ther is in yorkshire / as I gesse
A merssh contree / called Holdernesse [[Painting of the Summoner]]
In which / ther wente a lymytour aboute
To preche / and eek to begge / it is no doute
Line 1712
And so bifel / that on a day / this frere
Hadde preched at a chirche in his manere
And specially / abouen euery thyng/
Excited he the peple / in his prechyng
Line 1716
To trentals / and to yeue for goddes sake
Wher-with / men myghte hooly houses make
Ther as diuine seruyce is honoured
Nat ther as it is wasted and deuoured
Line 1720
Ne ther it nedeth nat/ for to be yeue
As to possessioners / that mowen lyue
Thanked be god / in wele and habundaunce [folio 85b]
Trentals seyde he / deliueren fro penaunce
Line 1724
Hir freendes soules / as wel olde as yonge
Ye / whan þat they been hastily ysonge
Nat for to holde a preest Ioly and gay
He syngeth nat but o masse in a day
Line 1728
Deliuereth out quod he / anon the soules
fful hard it is / with flesshhook or with oules
To been yclawed / or to brenne or bake
Now spede yow hastily / for cristes sake
Line 1732
And whan this frere / had seyd al his entente
With / qui cum patre / forth his wey he wente
¶ Whan folk in chirche / had yeue him / what hem lest
He went his wey / no lenger wolde he reste
Line 1736
