[6-text p 381]
I payde at hoom / for thy correccioun
¶ Thou lixt quod she / by my sauacioun
Ne was I neuere er now / wydwe ne wyf
Somoned vn-to youre court in al my lyf
Line 1620
Ne neuere I nas / but of my body trewe
Vn-to the deuel / blak and rough of hewe
Yeue I thy body / and my panne also
¶ And whan the deuel / herde hire cursen so
Line 1624
Vp-on hir knees / he seyde in this manere
Now Mabely / myn owene moder deere
Is this youre wyl / in ernest þat ye seye?
¶ The deuel quod she / so fecche hym er he deye
Line 1628
And panne and al / but he wol hym repente
¶ Nay olde Stot that is nat myn entente
Quod this Somonour / for to repente me
ffor any thyng that I haue had of thee
Line 1632
I wolde I hadde thy smok and euery clooth
¶ Now brother quod the deuel / be nat wrooth
Thy body and this panne / been myne by right
Thou shalt with me to helle / yet to-nyght
Line 1636
Where / thou shalt knowen / of oure priuetee
Moore / than a maister of dyuynytee
And with that word / this foule feend hym hente
Body and soule / he with the deuel wente
Line 1640
Where as that Somonours / han hir heritage [folio 84b]
And god / þat made / after his ymage
Mankynde / saue and gyde vs alle and some
And leue thise Somonours / goode men bicome
Line 1644
LOrdynges / I koude han toold yow quod this frere
Hadde I had leyser / for this Somnour heere
After the text of Crist/ Poul / and Iohn
And of oure othere doctours many oon
Line 1648
Swiche peynes / that youre herte myghte agryse
Al be it so / no tonge may it deuyse
Thogh þat I myghte / a thousand wynter telle
The peynes / of thilke cursed hous of helle
Line 1652
