[6-text p 370]
And but I be tomorn / as fair to seene
As any lady / Emperice or queene
That is bitwixe the Est and eke the West
Dooth with my lyf / and deth / right as yow lest
Line 1248
Cast vp the curtyn / looke how that it is
¶ And whan the knyght saugh verraily al this
That she so fair was / and so yong ther-to
ffor ioye / he hente hire / in hise armes two
Line 1252
His herte bathed / in a bath of blisse
A thousand tyme arewe / he gan hire kisse
And she obeyed hym in euery thyng
That myghte doon hym plesance or likyng
Line 1256
¶ And thus they lyue / vn-to hir lyues ende
In parfit ioye / and Ihesu crist vs sende
Housbondes meeke / yonge / fressh a bedde
And grace / touerbyde hem þat we wedde
Line 1260
And eek / I pray Ihesu shorte hir lyues
That nat wol be gouerned by hir wyues
And olde and angry nygardes of dispence
God sende hem soone / verray pestilence
Line 1264
¶ Heere endeth / the Wyues tale of Bathe .
