[6-text p 349]
With my gossib / dwellynge in oure toun
God haue hir soule / hir name was Alisoun
She knew myn herte / and eek my priuetee
Bet than oure parisshe preest as moot I thee
Line 532
To hire / biwreyed I / my conseil al
ffor hadde myn housbonde / pissed on a wal
Or doon a thyng þat sholde han cost his lyf /
To hire / and to another worthy wyf /
Line 536
And to my Nece / which þat I loued weel
I wolde han toold / his conseil euery deel
And so I dide / ful often god it woot
That made his face / ful often reed and hoot
Line 540
ffor verray shame / and blamed hym self for he?
Had toold to me / so greet a pryuetee
¶ And so bifel / that ones in a lente
So often tymes / I to my gossyb wente
Line 544
ffor euere yet I loued to be gay
And for to walke / in March / Auerill and May
ffro hous to hous / to heere sondry talys
That Iankyn Clerk and my gossyb dame Alys
Line 548
And I my self / in-to the feeldes wente
Myn housbonde / was at London al the lente
I hadde / the bettre leyser for to pleye
And for to se / and eek for to be seye
Line 552
Of lusty folk what wiste I / wher my grace
Was shapen for to be / or in what place
Therfore / I made my visitacions
To vigilies / and to processions
Line 556
To prechyng eek and to thise pilgrimages
To pleyes of myracles / and to mariages
And wered vpon / my gaye scarlet gytes
Thise wormes / ne thise Motthes / ne thise mytes
Line 560
Vpon my peril / frete hem neuer a deel [folio 73a]
And wostow why? for they were vsed weel
NOw wol I tellen forth / what happed me
I seye / that in the feeldes walked we
Line 564
